Mitti Test sirf ek formal kaam nahi hai iska asar pura building par padta hai

Zyada log soil ko bas zameen samajhte hain jiske upar construction hota hai. Lekin humare kaam mein mitti sabse pehla signal deti hai ki building sahi khadi hogi ya nahi.

Kuch hafte pehle ek local builder humare lab aaya. Usko Science City ke paas ek G plus 4 commercial building banani thi 1200 square yard ke plot par. Usne bola ek normal SBC test chahiye. Humne site visit kiya subah subah drilling machine ke saath.

Jab pehle borehole shuru kiya toh pehle 3 meter mein soil ka character do baar badal gaya. Pehle sandy silt phir hard clay aayi jo halki si wet thi. Jaise hi 7 point 5 meter par pahunche waha soil ka behavior thoda alag laga. IS 2131 ke according SPT test kiya aur reading mein ajeeb jump dikha.

Hume laga kuch toh dikkat hai.

Doosra borehole banaya toh waha ek patch mila jisme purana construction ka debris tha. Shayad pehle koi structure tha waha. Agar ye test nahi karte toh foundation uneven soil par padta aur future mein settlement ka issue aata.

Humne kya kiya

Humne 2 borehole banaye 15 meter tak jaise IS 1892 ke rule mein likha hai

Har 1 point 5 meter par SPT test kiya

Disturbed aur undisturbed samples lab mein test kiye

IS 6403 ke rule se final SBC calculate kiya

Aur report mein bataya ki kaunse foundation type ke liye site safe hai

Iska asli fayda kya tha

Soil upar se flat dikhti hai lekin andar har 2 feet par condition badal sakti hai. Agar test nahi kiya toh poori building ki jaanch andaze par chalegi. Aur estimate se leke safety tak sab kuch halki buniyad par banega.

Construction 30 50 ya 75 saal tak chalna hai. Pehla kadam sabse strong hona chahiye. Foundation design ka base wahi hota hai.